skrift.no er ein del av
 Litteraturnettet

Frå "Tida er verken ute eller inne" (1990):

Alle mine ufødde barn kjem
kvar kveld
og blandar seg i svevnen
Om morgonen prøver eg å kle på dei
og sende dei ut i verda

Frå "Huset på halvvegen" (1993):

Alle som kjem og går
lagar lydar
med føtene sine
Halv eller dobbel, seier hjorten
og spring langs ein grøn måne

Frå "Ferskentransporten" (1996):

VOICE OVER
Dei er vakrare enn himmelen og havet
vulkansk tilstades når dei drøymer
om eit heilagt fjell i horisonten

Jordskorpa har sine svake soner
krater, der dei legg kvarandre ned
Å drøyme er ingen dans på roser

Men dei tenkjer likevel
at noko vedunderleg skal opne seg
at livet ikkje er ein draum

Frå "Det Nasjonale Boblegalleri" (2000):

MODERATO CANTABILE
Eg er ho som gjekk ut av sitt gode skinn.
Eg er ho som kler seg i blått og går i eitt
med himmelen og havet.
Eg er ho som kler seg i svart når sola går ned.
Eg et japanske plommer som er raude tvers igjennom
og ber mine erfaringar som ein mann.
Eg er rett og slett ho som er mann for sin hatt.
Eg er ein mann dei listige kan rekne med.
For eg er kvinna som aldri kler seg i kvitt.

 Forfattarkatalogen    Tidsskriftet  'Forfatteren'    Spelkalender    lind.no  

webmaster@skrift.no (Idar Lind)